मोहिनी त्यो रुप तिम्रो

मोहिनी त्यो रुप तिम्रो जुन तारा लजाउने
बेचैन भो यो मन अब कसो गरी बुझाउने

गुराँस फुलेसरि आँखा जोबन पानीसरि चञ्चल
हेरिदिंदा त्यो आँखाले यो मनमा भयो हलचल
आँखैभित्र राखेपनि नबिझाउने काँढा हौ कि
बिर्सनै नसकिने तिमी याद आउँछ्यौ हरपल

स्मृतिको छायाँमा रहेको एक गीत तिमी
वसन्तको हरियाली प्रकृतिकै मीत तिमी
बिहानीको किरणसंगै मुस्कुराउने फूल अनि
अविरल बगिरहने पवित्र गंगा हौ तिमी

भेटूँ लाग्छ तिमीलाई सपनीमै भएपनि
हिंडिदिउँला बरु काँढा बाटोबीच भएपनि
थाहा छैन यो जुनीमा तिमीलाई पाउँछु कतै
पर्खिरहूँला म त अर्को जुनीसम्म भएपनि

शनीवार २३ जुलाई २००५, लण्डन।